کراچی میں گزشتہ چوبیس گھنٹوں میں عوامی نیشنل پارٹی کے تین کارکن ہلاک ہوئے ہیں۔ اے این پی تنظیم کا کہنا ہے کہ رواں ماہ میں ان کے سات کارکنوں اور ہمدروں کو قتل کیا گیا ہے۔

گلستان جوہر پولیس کا کہنا ہے کہ بدھ کی دوپہر کو پہلوان گوٹھ میں نامعلوم مسلح افراد کی فائرنگ سے شاہد غنی نامی شخص ہلاک ہوگئے۔ عوامی نیشنل پارٹی کے ترجمان قادر خان نے بی بی سی کو بتایا کہ شاہد غنی ان کے کارکن تھے اور گزشتہ رات ہلاک ہونے والے دو کارکنوں کی نماز جنازہ میں شرکت کے لیے جا رہے تھے کہ انہیں ٹارگٹ کیاگیا۔

اس سے قبل پہلوان گوٹھ کے ہی علاقے میں گزشتہ شب فائرنگ میں دو افراد ہلاک ہوگئے۔ پولیس کا کہنا ہے کہ مقتولین کی شناخت خیال نذیر اور سلیم خان کے نام سے ہوئی ہے۔ عوامی نیشنل پارٹی کا کہنا ہے کہ دونوں ان کے کارکن تھے۔

کراچی سے بی بی سی کے نامہ نگار ریاض سہیل کے مطابق ان ہلاکتوں کے بعد علاقے میں فائرنگ کا سلسلہ شروع ہوگیا اور علاقے میں کشیدگی پیدا ہوگئی۔

ایس پی گلستان جوہر نعیم شیخ نے ہلاکتوں کی وجہ سیاسی کشیدگی بتائی ہے۔’علاقے کی دو سیاسی جماعتیں اپنی چودہراہٹ قائم رکھنا چاہتی ہیں جس کے باعث یہ واقعات پیش آرہے ہیں۔‘

پولیس کا کہنا ہے کہ جلد ہی علاقے میں آپریشن کیا جائےگا تاہم اس آپریشن کی تاریخ اور تفصیلات بیان نہیں کی گئیں۔

دوسری جانب عوامی نیشنل پارٹی کے ترجمان قادر خان کا کہنا ہے کہ گلستان جوہر میں رواں ماہ میں ان کے سات کارکنوں کو قتل کیا گیا ہے۔

ان کا کہنا ہے کہ گزشتہ دو سالوں سے یہ صورتحال جاری ہے اور جنگ اس بنیاد پر ہو رہی ہے کہ عوامی نینشل پارٹی کیوں اس علاقے میں داخل ہو رہی ہے اور وہ اپنے دفتار یہاں کیوں کھول رہی ہے ۔

قادر خان کے مطابق پہلے اے این پی کو صرف ندی نالوں پر رہنے والے لوگوں کی جماعت تصور کیا جاتا تھا مگر بارہ مئی دو ہزار سات کے واقعات کے بعد پشتونوں میں یہ احساس پیدا ہوا ہے کہ انہیں ایک پلیٹ فارم پر متحد ہونا چاہیے۔

انہوں نے کسی بھی پرتشدد کارروائیوں میں ملوث ہونے کے الزام کو مسترد کیا اور کہا کہ ان کی کارکنوں کو ہدایت ہے کہ وہ باچا خان کے امن کے پیغام پر عمل پیرا رہیں۔

source : bbc.co.uk