پاکستان کے صوبہ خیبر پختونخواہ کے ضلع ہنگو میں نامعلوم افراد نے لیویز فورس کی ایک خاتون ہیڈ کانسٹیبل کے مکان پر حملہ کرکے دو بیٹوں، بیٹیوں اور بہو سمیت چھ افراد کو ہلاک کر دیا ہے۔

یہ واقعہ ہنگو میں ٹل تحصیل کے گاؤں توت کس میں جمعہ اور جمرات کی درمیانی شب پیش آیا۔

ٹل پولیس کے مطابق نامعلوم افراد نے ہیڈ کانسٹیبل شمشاد بیگم کے مکان پر خود کار ہتھیاروں سے حملہ کیا جس میں شماد بیگم، اُن کے دو بیٹے، دو بیٹیاں اور ایک بہو ہلاک جبکہ ایک بچہ زخمی ہوا ہے۔

پولیس حکام کا کہنا ہے کہ شمشاد بیگم کے گھر کو پہلے بھی نشانہ بنانے کی کوشش کی گئی تھی جب نامعلوم افراد نے اُن کے مکان کے قریب بم نصب کر دیے تھے جنھیں پولیس نے پھٹنے سے پہلے ناکارہ بنا دیا تھا۔

نامہ نگار عزیز اللہ خان کے مطابق ٹل پولیس اہلکاروں کا کہنا ہے کہ شمشاد بیگم کا تعلق بنوں سے تھا اور وہ اپنی نوکری کی خاطر ٹل میں رہائش پذیر تھیں اور اِن دنوں انھیں چطپری پھاٹک پر تعینات کیا گیا تھا۔

پولیس حکام کا کہنا ہے کہ لیڈی ہیڈ کانسٹیبل کو نامعلوم افراد کی جانب سے دھمکیاں دی جاتی رہی ہیں کہ وہ یہ نوکری چھوڑ دیں۔

حکام کا کہنا ہے کہ تاحال یہ واضح نہیں ہے کہ اس حملے میں کون ملوث ہے اور اس بارے میں تفتیش کی جا رہی ہے۔

source : bbc.co.uk